ஷோபன்

இந்த வாரம் - 02 April 2011

2011-03-31T23:38:00.002+05:30

ரசித்த புகைப்படம்

இந்தியா-ஆஸ்திரேலியா உலகக்கோப்பை கால்-இறுதி

பார்த்த சினிமா

50 First Dates - கிட்டத்தட்ட 6 வருடங்களுக்கு முன் சென்னை ஐ.ஐ.டி.யில் படித்துக்கொண்டிருந்த போது, அங்குள்ள திறந்தவெளி திரையரங்கில் பார்த்தது. மீண்டும் நேற்று இரவு பார்த்தேன். Short-term memory loss-ஐ பிண்ணனியாகக் கொண்ட பல படங்களில் இதுவும் ஒன்று. லூசி-க்கும் அவரது அப்பாவுக்கும் நடந்த ஒரு கார் விபத்தில் லூசிக்கு Short-term memory loss ஏற்படுகிறது. இவருடைய ஞாபகங்கள் ஒரு நாள்தான் இருக்கும், மறு நாள் காலை நேற்று நடந்தது எல்லாம் மறந்து புதிதாய் ஆரம்பிக்கும்.

இவரை ஒரு காஃபி ஷாப்பில் சந்திக்கும் ஜொள்ளன் + வெட்டினரி டாக்டர் ஹென்றி விரும்புகிறார். லூசிக்கு இப்படி ஒரு வியாதி இருப்பது ஹென்றிக்கு பின்னர்தான் தெரியவருகிறது. ஹென்றியும், லூசியின் அப்பா மற்றும் தம்பியும் இணைந்து எப்படி லூசிக்கு இதை புரியவைக்கிறார்கள், பின் எப்படி லூசியும், ஹென்றியும் இணைகிறார்கள் என்பதை மெல்லிய நகைச்சுவையுடன் சொல்லியிருக்கிறார்கள். லூசியாக Drew Barrymoreம், ஹென்றியாக Adam Sandlerம் நடித்தது. ஒரு ஃபீல் குட் படம்.

எந்திரன் - படம் வெளியான அடுத்த நாள் அதிகாலையே இணையத்தில் ஹிந்தி பதிப்பு கிடைத்தது. எனக்கு ஹிந்தியில் ஹிந்தி என்ற வார்த்தையைத் தவிர வேறு எதுவும் தெரியாததால் படம் பார்க்கவில்லை. வெகு நாட்களுக்குப் பிறகு சமீபத்தில் பார்க்கக் கிடைத்தது. நான் ரஜினியின் பரம ரசிகன்தான், இருந்தாலும் எந்திரன் பெரிதாக என்னைக் கவரவில்லை. சன் பிக்சர்ஸ், ஷங்கர், ரஹ்மான், பிரபல தொழில் நுட்பக் கலைஞர்கள், ஹாலிவுட் கிராபிக்ஸ் வல்லுனர்கள்....எல்லாம் சேர்ந்து திரும்பவும் ஒரு காதல் கதையைத்தான் கொடுத்திருக்கிறார்கள். உலகப்புகழ் பெற்ற ஹாலிவுட் வல்லுனர்களை வைத்துக்கொண்டு, ஹாலிவுட்டுக்கே சவால் என்பதும், உலகத்தரம் என்று அவர்களே சொல்லிக்கொள்வதும் அசிங்கமாக இருக்கிறது. இத்தனை தொழில் நுட்ப நேர்த்திகளையும் தமிழர்களைக் கொண்டோ அல்லது பிற இந்திய கலைஞர்களைக் கொண்டோ செய்திருந்தால், மிகப் பெருமையாக ஹாலிவுட்டிற்கே சவால் என்று சொல்லிக்கொள்ளலாம்.

இவையனைத்தையும் தாண்டி எனக்கு படத்தில் மிகவும் பிடித்தது, ரஜினியின் உழைப்பு. இந்த வயதில் என்ன ஒரு உழைப்பு, அர்ப்பணிப்பு - Hats off! ஒரு மிகச்சிறந்த நடிகனை இப்படி கோமாளியாக ஆக்கிவிட்டார்களே என்ற வருத்தம்தான் மிஞ்சுகிறது.

படித்த புத்தகம்

இனிமேல் படித்த புத்தகங்களை தனியாக 'புத்தகம் - தலைப்பு - ஆசிரியர்' என்று தனிப்பதிவுகளாகவே போடலாமென்றிருக்கிறேன். முதல் புத்தக பதிவாக '5 Point Someone' by சேத்தன் பகத், விரைவில்.

செவிக்குணவில்லாத போது

கொஞ்சம் கிராண்டாக சாப்பிட வேண்டும், அதே சமயம் பாக்கெட்டும் பத்திரமாக இருக்கவேண்டுமா? அன்-லிமிடெடாக பலவித வெஜ், நான்-வெஜ் உணவுகள், டெசர்ட்கள் மற்றும் கூடவே அன்-லிமிடெட் பியரும் வேண்டுமா? ஆமாம்ப்பா..ஆமாம் என்றால் -

தாஜ் கேட்வே (Hotel Taj Gateway) - பெங்களூர் ரெசிடென்ஸி சாலையில், மேயோ ஹாலுக்கு எதிரே உள்ளது. இங்கு அருமையான இரவு பஃபே வெறும் ரூ.650 + Taxes க்கு கிடைக்கிறது. 10-15 விதமான ஸ்டார்டர்கள், உங்கள் டேபிளுக்கே வந்து வழங்கப்படுகிறது. அதைத் தவிர பலவித மெயின் கோர்ஸ் உணவுகள் மற்றும் விதவிதமான ஸ்வீட்கள், கேக்குகள் மற்றும் ஐஸ்கிரீம்கள் கூடவே பியர். தேவையெனில் வேறு காக்டெயில்களோ/ மாக்டெயில்களோ ஆர்டர் செய்து கொள்ளலாம் (இது தனி பில்..). ஒவ்வொரு நாளும் ஒவ்வொரு வித குசின்கள் - போன் செய்து விசாரித்துக் கொண்டு செல்லலாம்.

காதலியுடனோ/ குடும்பத்துடனோ சென்று, ஒரு பூல்-சைட் (Pool side) டேபிள் ரிசர்வ் செய்து கொண்டு ஆனந்தமாக ஒரு இரவு உணவை அனுபவிக்க சிறந்த இடம். (வருடத்திற்கு ஒருமுறையோ / இருமுறையோ செல்லலாம், எனக்கெல்லாம் அவ்வளவுதான் கட்டுபடியாகும் :-)).

அடுத்த வாரம் தாஜ் விவான்டா (Taj Vivanta, MG Road, Bangalore).

கொஞ்சம் அரசியல்

விஜயகாந்த் அவரது வேட்பாளரை அடித்த வீடியோ பார்த்தேன். கடுமையான தேர்தல் பிரச்சார அலைச்சலால் எவ்வளவுதான் மன அழுத்தம், உடல் நலக்குறைவு என்று எவ்வளவோ காரணங்கள் இருக்கலாம், ஆனாலும் இப்படி பொது இடங்களில் நடந்து கொள்வது நாகரீகம் இல்லை. அவரின் மீதுள்ள மரியாதை குறைகிறது. இந்த குறைந்த பட்ச பிரஷரைக்கூட மேனேஜ் செய்யமுடியாத இவர் ஆட்சிக்கு வந்து எப்படி பலமுக பிரஷர்களை சமாளிப்பார்?

ஆனால் எனக்கென்னவோ விஜயகாந்த் வந்துவிடுவார் போல்தான் தெரிகிறது. "அவரோட ஆளையே இந்த அடி அடிக்கிறாரே...அப்ப தப்பு செய்றவங்களை எப்பிடி அடிப்பாரு" என்று நம்பும் மக்கள் இருக்கும் வரை இவரை ஒன்றும் செய்யமுடியாது.

ஒரு SMS நகைச்சுவை

ஒரு எரிமலை வெடித்துச் சிதறுவதற்கு யாரும் கற்றுத்தருவதில்லை,

கடல் சுனாமியாய்ச் சீறுவதற்கு யாரும் கற்றுத்தருவதில்லை,

காற்று சூறாவளியாய் வீசுவதற்கு யாரும் கற்றுத்தருவதில்லை...

அது போல்.....

நல்ல மனைவியைத் தேர்ந்தெடுக்கவும் யாரும் கற்றுத்தருவதில்லை, ஏனெனில்.....................

இயற்கைச் சீற்றங்கள் தானாகத்தான் நிகழும் :-)

(SMS அனுப்பிய நண்பர் வெங்கடபதிக்கு நன்றி...நண்பேண்டா....)

அடுத்த வாரம் பார்க்கலாம்,

- ஷோபன்

ரசித்த நகைச்சுவை

2011-03-31T18:43:00.001+05:30

ஒரு முறை போடி பேருந்து நிலையத்தில் கோவை செல்லும் பேருந்திற்காக காத்துக்கொண்டிருந்தேன். பொதுவாக போடி வழியாக கோவை செல்லும் பேருந்த்துகள் மிகவும் குறைவு (அப்போது ஒன்றே ஒன்றுதான் இருந்தது) என்பதால், கூட்டம் மிக அதிகமாக இருக்கும். பேருந்து உள்ளே நுழைந்த உடனேயே எந்தெந்த வழியாக எல்லாம் உள்ளே நுழைய முடியுமோ அத்தனை வழிகளிலும் மக்கள் முண்டியடித்து ஏறிக்கொண்டிருந்தனர். ஒவ்வொருவரும் அவரவர் சக்திக்கு தகுந்தவாறு செருப்பு, குடை, கைக்குட்டை, துண்டு, கூடை போன்றவற்றை ஜன்னல் வழியாக நுழைத்து இடம் பிடிக்க ஆளாய்ப் பறந்து கொண்டிருந்தனர். ஒரு பய பக்கி, அவரின் 4-5 வயது மகனை ஜன்னல் வழியாக உள்ளே நுழைத்து இருவர் அமரும் சீட்டைப் பிடித்துவிட்டார். பேருந்து கிளம்ப சிறிது நேரமாகுமாதலால் அந்த ஆள் எங்கோ தம்மடிக்கப் போய்விட்டார்.

அப்போது கண்டக்டர் கூட்டத்தினுள் எப்படியோ புகுந்து டிக்கெட் கொடுக்க ஆரம்பித்துவிட்டார். அந்த குட்டிப்பையனின் அப்பா மட்டும் இன்னும் வரவில்லை. பையன் வேறு லைட்டாக அழ ஆரம்பித்துவிட்டான். இப்போது கண்டக்டருக்கும் அந்த குட்டிப்பையனுக்குமான உரையாடலைப் பாருங்கள்:

"டேய் தம்பி, உங்கூட யாரு வந்தா?", கண்டக்டர்.

"ம்ம்ம்ம்...ம்ம்ம்ம்..."

கூட்டத்தைப் பார்த்து, "ஏம்பா, யாரப்பா இந்த பையன் கூட வந்தது?...யாருக்காச்சும் தெரியுமா?"

"டேய் தம்பி, யாரு கூடப்பா வந்த?"

"ஹூம்ம்ம்ம்...ம்ம்ம்ம்ம்ம்......"

"உங்க அப்பா எங்கப்பா?"

பையன் சுதாரித்து, "அப்பாபாபாபாபாபா.....ம்ம்ம்ம்ம்...அவ்வ்வ்வ்..."

"யோவ், யாருய்யா இந்த பையனோட அப்பன்...எங்கியாச்சும் வெளிய கிளிய நிக்கிறானானு பாருங்கப்பா...டையமாச்சு...வண்டிய எடுக்கனும்...புள்ளைய விட்டுட்டு எங்குட்டு பராக்கு பாத்துக்கிட்டு இருக்கானோ..."

"தம்பி, உங்க அப்பா பேரென்ன?"

"அப்பாபாபாபாபாபா.....ம்ம்ம்ம்ம்"

"சரி...சரி, நீ எங்க போகனும்?"

"வீட்டுக்குப் போகனும்..ம்ம்ம்ம்..."

"சரிப்பா...வீடு எங்கயிருக்கு?"

"ஊருல...."

"எந்த ஊருல?"

"போடி..."

"காலங்காத்தால கடுப்படிக்கிறானே...வீடு போடிலனா அப்புறம் எதுக்கு பஸ்ல ஏறுனீங்க..."

"வீட்டுக்கு போக...."

"ஆண்டவா திரும்பவும் ஆரம்பிக்கிறானே...எந்த வீட்டுக்கு..?"

"தாத்தா வீட்டுக்கு..."

"தாத்தா வீடு எங்கயிருக்கு...?"

"ஊருல..."

"எந்த ஊரு...?"

"தாத்தா ஊரு...."

"டேய்ய்ய்ய்...ங்கொப்பன் மட்டும் எங்கையில மாட்டுனாய்ன்னு வச்சுக்க....."

"யேய்..விடப்பா...நீ எதுக்கு இம்புட்டு டென்சனாகுரவன்....என்னா ஏதுன்னு மெதுவாக் கேளப்பா...?", இன்னொருவர்.

"சரி சொல்லு, தாத்தா ஊரு எங்கயிருக்கு...?"

"எங்க தாத்தா வீடு இருக்குல...அங்கதான்..."

"டேய்ய்ய்ய்ய்ய்ய்......"

-ஷோபன்

ஊர்சுற்றி - நந்தி ஹில்ஸ், பெங்களூர்

2011-03-31T11:19:00.004+05:30

பல நாட்களாகவே குடும்பத்தாருடனும், நண்பர்களுடனும் எங்காவது வெளியே சென்று வந்தால் நன்றாக இருக்குமென்று தோன்றியது. ஒரு நாள் காலை 10 மணிக்கு மேல் முடிவு செய்து, அவசரமாக எல்லாம் பெட்டி கட்டிக்கொண்டு சூறாவளிச் சுற்றுப்பயணமாக நந்தி ஹில்ஸ் சென்று வந்தோம்.

நந்தி துர்க்கா என்ற நந்தி ஹில்ஸ் பெங்களூரிலிருந்து சுமார் 65 கி.மீ. தொலைவில், பன்னாட்டு விமான நிலையத்திற்கு அடுத்து, சிக்கபேலாப்பூர் மாவட்டத்தில் உள்ளது. நந்தி ஹில்ஸ் என்ற பெயருக்கு பல கதைகள் இருப்பதாக விக்கிபீடியா சொல்கிறது. சோழர்கள் காலத்தில் 'ஆனந்தபுரி' என்றும், யோக நந்தீஸ்வரர் பெயரிலும், திப்பு சுல்தானின் கோட்டை (நந்திகள் காவல் தெய்வங்களாக கருதப்படுவதால் 'நந்தி துர்க்') இருப்பதாலும், அல்லது மிக தொலைவிலிருந்து பார்த்தால் மலையே நந்தி போல் தோன்றுவதாலும் நந்தி ஹில்ஸ் என்று அழைக்கப்படுகிறது. (பெரும்பாலான விபரங்களை விக்கி மற்றும் பல இணையதளங்களிலிருந்து சேகரித்துதான் எழுதுகிறேன்).

(காரில் செல்லும்போது நண்பர் எடுத்தது)

என்ன இருக்கிறது

மலையின் அடிவாரத்தில் 'போக நந்தீஸ்வரர்' கோவிலும், மலையின் மேல் 'உக்கிர நந்தீஸ்வரர்' மற்றும் 'யோக நந்தீஸ்வரர்' கோவிலும் இருக்கிறது. இவை கிட்டத்தட்ட 9-12ம் நூற்றாண்டைச் சேர்ந்தவை என்றும் கர்னாடகாவில் உள்ள மிகப் பழமையான கோவில்களுள் ஒன்றென்றும் சொல்லப்படுகிறது.

யோக நந்தீஸ்வரர் கோவில்

(நன்றி: bangalore.metblogs.com)

இதில் 'போக நந்தீஸ்வரர்' கோவிலின் அஸ்திவாரத்தை பனாஸ்கள் 9ம் நூற்றாண்டிலும், மேற்கூரையை சோழர்கள் 11ம் நூற்றாண்டிலும், திருமண மண்டபத்தை ஹொய்சாலர்கள் 13ம் நூற்றாண்டிலும், இரண்டாம் அடுக்கு பிரகாரத்தை விஜய நகர மன்னர்களும் கட்ட்டியதாக வரலாறு சொல்கிறது. இதைத் தவிர ஒரு அழகான குளமும் உள்ளது.

கல்யாணி குளம்

(நன்றி: bangalore.metblogs.com)

இவற்றைத் தவிர, திப்பு சுல்தானின் கோடைக்கால ஒய்வு மாளிகையும், கோட்டைச் சுற்றுச் சுவர்களும் உள்ளது. பென்னாறு, பாலாறு மற்றும் அர்காவதி ஆறு இம்மூன்றும் இங்கிருந்த்துதான் உற்பத்தியாகிறதாம், ஒன்றைக்கூட கண்ணில் காணமுடியவில்லை. திப்பு டிராப் (Tippu's Drop) எனப்படும் செங்குத்தான, ஆபத்தான மலைச்சரிவும் இருக்கிறது - இங்கிருந்துதான் திப்புவின் கைதிகளை மலையிலிருந்து தள்ளி கொல்வார்களாம்.

திப்பு டிராப் (Tippu's Drop)

(நன்றி: holidayiq.com)

இதைத் தவிர அரசு தோட்டக்கலைத் துறையினரின் நேரு நிலையம் என்ற விருந்தினர் விடுதி உள்ளது. மயூரா என்றொரு மொக்கையான உணவு விடுதியும், நான்கைந்து சிறிய பெட்டிக்கடைகளும் உள்ளன.

எப்படி போகலாம்?
பெங்களூர் மெஜஸ்டிக் பேருந்து நிலையத்திலிருந்து KSRTC பேருந்துகள் உள்ளன. காரில் செல்வதானால் - மேக்ரி சர்க்கிள் - பேலஸ் மைதானம் - RT நகர் வழியாக தேவனஹல்லி விமான நிலையம் செல்லும் அருமையான நான்கு வழி எக்ஸ்பிரஸ் சாலை உள்ளது. மலைப்பாதைகளும் நன்றாக இருக்கிறது. நிறைய வளைவுகள் மற்றும் ஏற்றம் அதிகமான பாதைகள். பெங்களூரிலிருந்து கிட்டத்தட்ட 70 கி.மீ. தான் என்பதால் நிறைய நண்பர்கள் இருசக்கர வாகனங்களிலும் வருகிறார்கள் (பெரும்பாலும் காதல் ஜோடிகள்). மாலை 6 மணிக்கு மேல் உள்ளே செல்ல அனுமதியில்லை.

காரில் செல்லும்போது நண்பர் எடுத்தது

மலைப்பாதை

(நன்றி: pawsalava.com)

கோட்டை நுழைவாயில்

(நன்றி: pawsalava.com)

சாப்பிட?

வீட்டிலிருந்தே ஏதேனும் செய்து கொண்டு செல்வது நலம். மலை மேல் அழகான பூங்காவில் அமர்ந்து சாப்பிடலாம். நாங்கள் அவசரமாக கடைசி நேரத்தில் முடிவு செய்து கிளம்பியதால் ஒன்றும் எடுத்துக்கொள்ளவில்லை. 10 பாட்டில்களில் தண்ணீர் மட்டும் எடுத்துக்கொண்டோம் (போகுமிடமெல்லாம் தண்ணீரை 15 ரூபாய் கொடுத்து வாங்கி குடிக்க மனதில்லை).

தேவனஹல்லி விமான நிலையத்திற்கு முன் உள்ள டோல் கேட்டைத் தாண்டியஉடன் 'பஞ்சாவதி' என்றொரு தாபா போன்ற உணவகம் இருக்கிறது. நல்ல ஸ்பைசியாக சாப்பிட விரும்பினால் இங்கு சாப்பிடலாம். ஒரு சிக்கன் பிரியாணி 75 ரூபாய்தான்(!). ரோட்டி, நான் போன்றவைகள் விலை குறைவுதான், ஆனால் சைட் டிஸ்களில் காசு பார்த்துவிடுகிறார்கள். அமுல் ஐஸ்கிரீம் கிடைக்கிறது. இதைவிட்டால் இரண்டு, மூன்று ரெஸ்டாரண்டுகள் வழியில் இருக்கிறது, மலைக்கு மேல் மயூரா என்ற அரசு உணவு விடுதியும் (வெஜ்) இருக்கிறது.

எப்போது போகலாம்?
வருடம் முழுக்க போகலாம் என்றாலும், குளிர் காலங்களில் மிக அருமையாக இருக்கும். பிற நாட்களில் அதிகாலை செல்வது நன்றாக இருக்கும், மலையின் மேல் 5 மணிக்கு இருப்பது போல் சென்றால், சூரிய உதயத்தையும், அழகான அதிகாலைப் பனிமூட்டத்தையும் பார்த்து ரசிக்கலாம். அதிகாலை 5 மணி என்பதெல்லாம் நள்ளிரவு என்று என்னைப்போல சொல்பவர்கள் Google Imagesல் படம் பார்த்து ரசிக்கலாம் :-).

ஒரு சிறு குழுவாக நண்பர்களுடனோ அல்லது குடும்பத்தினருடனோ ஒரு நாள் பயணமாக சென்று வருவதற்கு ஏற்ற இடம்.

அடுத்த ஊர்சுற்றியில் குரங்கணி (தேனி மாவட்டம்).

- ஷோபன்

இந்த வாரம் - 28 March 2011

2011-03-28T19:00:00.011+05:30

ஊர் சுற்றி
சென்ற வாரத்திலிருந்து அடுத்த வாரம் வரை வேலை பெரிதாக ஒன்றும் இல்லாததால், விடுமுறையில் இருக்கிறேன். எங்காவது வெளியில் ஊர் சுற்றலாமென்றால், மனைவிக்கு கைவசம் விடுப்புகள் இல்லை. எனவே நேற்று ஒரு நாள் மட்டும் எங்காவது செல்லலாம் என்று கிளம்பி, நந்தி ஹில்ஸ் (Nandi Hills, Bangalore) சென்றோம். இப்படி ஊர் சுற்றிய அனுபவங்களை 'ஊர் சுற்றி' என்ற தலைப்பில் எழுதலாம் என்று உத்தேசம்.

புத்தகம்
'ஒண்டிக்கட்டை உலகம்' - சிபி.கே.சாலமன் - கிழக்கு பதிப்பகம். 'உங்கள் பேச்சிலர் வாழ்க்கையின் அத்தனை சில்லறைத் தொந்தரவுகளுக்கும் தீர்வு சொல்கிறது இந்தப் புத்தகம்' என்று ஆரம்பிக்கின்ற அட்டையிலிருந்து பின் அட்டை வரை, ஒரு மெல்லிய புன்முறுவலுடன் படித்துக்கொண்டே போகலாம். ஒவ்வொரு அத்தியாயங்களின் தலைப்பே சுவாரஸ்யமாக நம்மை உள்ளே இழுக்கிறது, உதாரணம் - 'என் டான்டெக்ஸ்தான், எனக்கு மட்டும்தான்!' கிட்டத்தட்ட 'Dummies book for Bachelors' :-) போல இருந்தாலும், பழைய ஞாபகங்களை அசைபோட உதவுகிறது. என்னதான் உபயோகமான தகவல்களாக இருந்தாலும் ரூம் மேட் அமைவதெல்லாம் இறைவன் கொடுத்த வரம்தான் :-).

இ.ரா.முருகனின் 'அரசூர் வம்சம்' படிக்க ஆரம்பித்திருக்கிறேன். ஒரே மூச்சில் படிக்கும் அளவிற்கு புத்தகத்தில் சுவாரஸ்யம் இல்லையா, அல்லது எனக்குதான் அப்படி தோன்றுகிறதா என்று தெரியவில்லை. பார்க்கலாம். படிக்க வேண்டியது நிறைய இருக்கிறது - The Celestine Prophecy by James Redfield, Devil in Pinstripes by Ravi Subramaniyan, என் பெயர் வித்யா - லிவிங் ஸ்மைல் வித்யா மற்றும் சில அமர் சித்திர கதைகள், இந்த வாரத்திற்கு.

சினிமா
நீண்ட நாட்கள் கழித்துதான் பல படங்களை பார்க்கும் வாய்ப்பு கிட்டியது. சென்ற 10 நாட்களில் பார்த்தது-

ஆடுகளம் - இது மனித உணர்வுகள் ஆடும் களம். பேட்டைக்காரர் பாத்திரம் அற்புதம் (பிண்ணனிக் குரல் ராதாரவியாம், வாவ்!). எனக்கு அவரின் மனைவியாக வருபவரின் பாத்திரம் மிகவும் பிடித்திருந்தது (மீனாள்). ஒரு சந்தேகம் - சேவல் சண்டையில் போது சேவலின் காலில் சிறிய கத்தியை கட்டியிருப்பார்கள், நான் நேரில் பார்த்திருக்கிறேன் - இந்த படத்தில் அதை எங்கேயும் காணோம் - ஒருவேளை நான் சரியாக கவனிக்கவில்லையா இல்லை இது ஒருவகையான சேவல் சண்டையா?

காவலன் - பயந்துகொண்டே பார்க்க ஆரம்பித்து, பின் முழுதாகப் பார்த்தேன். அசினா இது, விஜய்யை விட வயதானவராக தெரிகிறார், அசினைவிட வடிவேலுவின் ஜோடியாக வருபவர் நன்றாக இருந்தார் :-) (தீபா?). விஜய்யைப் பற்றியெல்லாம் சொல்லிக்கொள்ள ஒன்றுமில்லை - அப்படி அவசியம் விஜய்யைப் பற்றி ஏதாவது படித்தே ஆகவேண்டுமென்றால் பன்னிக்குட்டி ராமசாமியின் இந்த பதிவைப் படியுங்கள் :-).

Babel - சுவாரஸ்யம் இல்லாமல் பார்க்க ஆரம்பித்து, பின் பார்த்து முடிக்கும் வரை இடத்தை விட்டு எழுந்திடுக்கவே இல்லை. ஒரு கச்சிதமான நான்-லீனியர் திரைக்கதை. மொராக்கோவில், தம்பியாக வரும் சிறுவனும் அவனின் அப்பாவின் நடிப்பும் அற்புதம். முதன்முறையாக துப்பாக்கியை விலை பேசும் போது, விற்பவர் 1000 என்று சொல்வார், அப்பா 500 என்று கேட்கும் போது - ஒரு மெல்லிய சங்கோஜம் கலந்த புன்னகை + துப்பாக்கி வாங்கப் போகிறோம் என்கிற பெருமிதம் எல்லாம் கலந்த ஒரு முகபாவம், அற்புதம்.

ரசித்த நகைச்சுவை
சென்ற வாரம், என் மனைவியை அழைத்துக்கொண்டு வருவதற்காக செயின்ட் ஜான்ஸ் மருத்துவமனைக்கு சென்றிடுந்தேன். அப்போது கேண்டீனில் ஒரு கணவன் மனைவி பேசிக்கொண்டதை கேட்டது.

"என்னங்க பெங்களூர்ல வெயில் இந்த போடு போடுது. ஏங்க கழுதைக்கும் கழுதைக்கும் கல்யாணம் பண்ணி வச்சா மழை பெய்யும்னு சொல்றாங்களே, அது உண்மையாங்க?"

கணவர் நக்கலாக, "இருக்கலாம்...உன் தங்கச்சி கல்யாணத்தன்னிக்கு மழை பேஞ்சதே".....ஒன்றும் புரியாமல் முழித்து பின் லேட்டாக புரிந்து கொண்டு மனைவி முறைக்க...நான் எஸ்கேப்.

ரசித்த பதிவு
கேபிள் சங்கரின் நான்-ஷர்மி-வைரம். ஆண் விபச்சாரம் பற்றி யாராவது எழுதுவார்களா என்று நீண்ட நாட்களாக எதிர்பார்த்துக் கொண்டிருந்தபோது, இனிய அதிர்ச்சியாக இந்த பதிவு. இப்படியெல்லாம் நடக்கிறதா என்று ஆச்சர்யமாய்/அதிர்ச்சியாய் பார்ப்பவர்களுக்கு: பெங்களூரின் டைம்ஸ் ஆஃப் இந்தியா-பெங்களூர் மிரர் போன்ற நாளிதழ்களில் வரும் வரி விளம்பரங்களைப் பாருங்கள்!

செங்கோவியின் சி.வி.(Resume) தயாரிப்பது எப்படி? - மிகவும் உபயோகமான பதிவு. அவரின் பதிவில் நான் இட்ட பின்னூட்டத்தை இங்கும் பதிகிறேன், எனது பதிவுகளையும் யாரேனும் படித்தால் பயன்படும்.

அன்பு செங்கோவி, உபயோகமான பதிவு. எனக்கு தெரிந்த சில டிப்ஸ்-
முதலில் நாம் முடிவு செய்ய வேண்டியது நாம் Resume தயார் செய்ய வேண்டுமா அல்லது CV தயார் செய்ய வேண்டுமா என்பது.

1. பொதுவாக Resume என்பது 1 அல்லது 2 பக்கங்களில் நம்முடைய வேலை அனுபவம், கல்வித்தகுதி மற்றும் special skill sets/ computer skills போன்றவை - எவ்வளவு சுருக்கமாக தர முடியுமோ அவ்வளவு நலம்.

2. CV என்பது சற்றே விரிவான (at least 3 pages) கல்வித்தகுதிகள், ஆராய்ச்சி மற்றும்/அல்லது ஆசிரியப் பணி அனுபவம், conference/journal publications, etc போன்றவை பற்றி ஒரு குறு அறிமுகம். CV - பொதுவாக கல்லூரி பணி, ஆராய்ச்சிப் பணி போன்ற பணிகளுக்கு CV உகந்தது, Resume அல்ல. எனவே, வேலைக்குத் தகுந்த CV/ Resume தயார் செய்வது அவசியம்.

3. Resume/CV top right headerல் "Resume of Sengovi" or "CV of Sengovi" என்று 2ம் பக்கத்திலிருந்து தருவதும் நல்லது. ஒருவேளை நீளமான பெயர் இருந்தால் முதல் பெயர் மட்டும் உசிதம்(உம்: அய்யம்பேட்டை அறிவுடை நம்பி கலியபெருமாள் சந்திரன் - "Resume of Chandran" போதும்).

4. Standard Font style உபயோகியுங்கள் (Arial/ Times New Roman) - fancy font களை தவிருங்கள்.

5. Skills போன்றவற்றை எழுதும் போது, குறைந்த பட்சம் அதைப் பற்றி தெரிந்த்தால் மட்டும் குறிப்பிடவும் - வேலைக்கு சேர்ந்த பின் படித்துக் கொள்ளலாம் என்றால் வேலைக்கே ஆகாது :-). LS DYNA தெரியும் என்று போட்டுவிட்டு, கேட்டால் 'தெருவில் போகும் போது விளம்பரம் பார்த்திருக்கிறேன்' என்று வழியக்கூடாது ;-) தெரியாதென்றால் தெரியாது என்று நேர்மையாக ஒத்துக்கொள்வது மிக நல்லது.

6. கேட்டால் ஒழிய புகைப்படம் தேவையில்லை.

7. கேட்டால் ஒழிய Referencesம் தேவையில்லை.

8. முக்கியமாக - நீங்கள் நேரில் சென்று கொடுக்கும் அல்லது hard copy யாக அனுப்பும் Resumeல் மட்டும் Declaration என்னும் 'நான் சொல்வதெல்லாம் உண்மை, உண்மையைத் தவிர வேறோன்றுமில்லை :-) பகுதியை இணைத்து கையொப்பமிடலாம். Email or Online application களில் இது தேவையில்லை.

9. உபயோகத்தில் உள்ள email address and Phone number கொடுக்கவும். Decent ஆன readable email ID யாக இருத்தல் நலம் (உம்: பட்டாசுபாலு@சிவகாசி.com ;-)

10. கடைசியாக, உங்கள் Resume/CV யை அனுப்பப்போகும் கம்பெனியின் HR ஸ்தானத்திலிருந்த்து உங்கள் Resumeஐ படித்துப் பாருங்கள் - உங்களுக்கு திருப்தி அளிக்கும் வகையில் இருந்த்தாலொழிய அனுப்ப வேண்டாம், சிறிய திருத்தங்ககள் செய்த பின் அனுப்பவும். தயவுசெய்து spelling mistakes இல்லாமல் அனுப்பவும்.

வாழ்த்துக்கள்!

அடுத்த வாரம் பார்க்கலாம்,
-ஷோபன்

பிச்சைக்காரர்களின் தேசம்

2011-03-21T12:12:00.007+05:30

நான் சராசரியாக நாளொன்றுக்கு 18-20 மணி நேரம் உழைக்கிறேன். என்னுடைய மாத சம்பளத்திலிருந்து பைசா சுத்தமாக கணக்கு பண்ணி வருமான வரி அரசாங்கத்திற்கு போகிறது. இதுவரை வருமான வரி ஏய்ப்பு செய்ததில்லை, செய்யவும் முடியாது - காரணம், அலுவலகங்களிலேயே வரி மற்றும் இதர பிடிப்புகள் போகத்தான் சம்பளம் கணக்கிற்கு வருகிறது. கிட்டத்தட்ட நான்கில் ஒரு பங்கு அல்லது ஐந்தில் ஒரு பங்கு வரியாகப் போகிறது. நான் மட்டுமல்ல, என்னைப்போல் ஐ.டி. யில், மென்பொருள் துறையில், கன்சல்டிங்கில், உற்பத்தித்துறையில்...என அனைவரின் உழைப்பின் ஒரு பகுதி வரியாக அரசாங்கத்திற்குப் போகிறது. அரசாங்க கஜானாவின் ஒரு பகுதி நம் வரிப்பணத்தால்தான் நிறைகிறது. நிற்க.

இதெல்லாம் இப்படியிருக்க, இவர்கள் விடும் தேர்தல் அறிக்கைகள் மற்றும் வாக்குறுதிகளைப் பார்க்கும்போதெல்லாம் பற்றிக்கொண்டு வருகிறது. எல்லாம் இலவசம் - டி.வி. இலவசம், மிக்ஸி இலவசம், கிரைண்டர் இலவசம், ...ஜட்டியும் கூட இலவசம். ஏண்டா டேய்...நாங்க உழைச்சு உழைச்சு வரியாக் கொட்டுவோம், நீங்க மசுரே போச்சுனு 'ஊரான் வீட்டு நெய்யே, என் பொண்டாட்டிங்க கையே'னு ஊருக்கெல்லாம் இலவசமா குடுப்பீங்களா? இன்னும் எத்தனை நாட்களுக்கு எங்களை பிச்சைக்காரர்களாகவே வைத்திருக்க உத்தேசம்.

எத்தனையோ கிராமங்களில் மின்சார வசதி இல்லை, நல்ல சாலை வசதி இல்லை, குறைந்த பட்ச மருத்துவ வசதிகள் இல்லை, குடி நீர் இல்லை, குண்டி கழுவ தண்ணீர் இல்லை...கழுவ என்ன கழுவ...முதலில் நல்ல கழிப்பிட வசதியில்லை. பெரு நகரங்களில் மட்டும் என்ன, நல்ல பொதுக்கழிப்பிடங்கள் இருக்கிறதா? பெரிதாய்ப் பீற்றிக் கொண்டு தேர்தல் வாக்குறுதிகளை விடும் பெருந்தலைவர்களே, உங்களால் ஒரே ஒருவேளை இந்த பொதுக்கழிப்பிடங்களை உபயோகப்படுத்த முடியுமா? அப்புறம் என்ன இழவிற்கு இலவச லேப்-டாப்பும் இலவச மிக்ஸியும்?

ஐயா பெருந்தலைவர்களே, எங்களுக்கு எல்லாவற்றையும் இலவசமாகவே தந்து எங்களைக் கேவலப்படுத்தாமல், இவை எல்லாவற்றையும் எங்கள் உழைப்பால் நாங்களாகவே வாங்கிக்கொள்ளும் அளவிற்கு எங்கள் வாழ்க்கைத் தரத்தை உயர்த்துங்கள், அதற்கான சமூக, பொருளாதார மாற்றங்க்களை கொண்டு வாருங்கள். எனக்கு எந்த கட்சி இலவசமாக மிக்ஸி கொடுக்கிறது என்று பார்ப்பதை விட, எந்த பிராண்ட் மிக்ஸி எனக்குத் தேவை என்று நானே பார்த்து வாங்கிக்கொள்ளும் அளவிற்கு என் வாழ்க்கைத் தரத்தை உயர்த்தினால், உங்களுக்கு புண்ணியமாய்ப் போகும்.

இவர்களைச் சொல்லியும் குற்றமில்லை, நம் மக்களை சொல்ல வேண்டும். எனக்கு பிச்சைக்காரனாகவே இருப்பதுதான் பிடிக்கிறது என்பவர்களை என்ன செய்வது. பொருளாதார அறிவியலில் ஒன்று சொல்வார்கள் - 'there is no such thing as a free lunch' - இந்த உலகில் இலவசம் என்று ஒன்று கிடையாது. நீங்கள் வாங்கும் ஒவ்வொரு இலவசமும் இன்னொருவரின் உழைப்பால் வந்தது என்பதை ஞாபகம் வைத்துக்கொள்ளுங்கள். இலவச டி.வி.களும், மிக்ஸிகளும் உங்களை மகிழ்விக்குமேயானால், நீங்களும் ஒரு வகையில் திருடர்கள்தான் என்பதையும் ஞாபகம் வைத்துக்கொள்ளுங்கள்.

-- ஷோபன்

இந்த வாரம் - 18 March 2011

2011-03-18T23:51:00.010+05:30

இந்த வாரம் - 18 March 2011

இந்த வாரம் என்ற தலைப்பில் நான் ரசித்த, பார்த்த, படித்த விஷயங்களை எழுத உத்தேசம்.

புத்தகங்கள்...

ராஜீவ் கொலை வழக்கு - ரகோத்தமன் - கிழக்கு பதிப்பகம்.
விடுதலைப் புலிகள் - மருதன் - கிழக்கு பதிப்பகம்.
பிரபாகரன் வாழ்வும் மரணமும் - பா.ராகவன் - கிழக்கு பதிப்பகம்.

என் நண்பர் ஒருவரின் பரிந்துரையின் பேரில் ராஜீவ் புத்தகத்தை வாங்கலாம் என்று கிழக்கை கிளிக்கிய போது ஒரு அருமையான தள்ளுபடி பற்றிய விளம்பரம் கண்டேன் (இருபது புத்தகங்கள் ஆயிரம் ரூபாய்). அந்த சலுகையில் வாங்கிய புத்தகங்கள்தான் இவை. மேலே குறிப்பிட்ட வரிசையில்தான் அவற்றை படித்தேன் - இது எதேச்சையானதுதான், ஆனால் சுவாரஸ்யமாக இருந்தது.

ராஜீவ் கொலை வழக்கு - அருமையாக் எழுதப்பட்ட புத்தகம் என்பதைவிட இது ஒரு அருமையான ஆவணம். அட்டை-முதல்-அட்டை-வரை விறுவிறுப்பிற்கு பஞ்சமில்லை. விடுதலைப் புலிகளின் திட்டமிடல், சுய கட்டுப்பாடு, அவர்களின் நெட்வொர்க் போன்றவை வியப்படைய வைக்கின்றன. எதற்காக இப்படி ஒரு கொலை - அடுத்த புத்தகத்தில் விரிவாக இருக்கிறது.

ராஜீவ் கொலை வழக்கை ஆரம்பமாக வைத்து, விடுதலைப் புலிகளின் தோற்றம், வளர்ச்சி பற்றி விரிவாக அலசுகிறார் மருதன். என்னைப் போல ஈழம் பற்றிய பிரச்சினைகளை முழுதும் தெரியாத தற்குறிகளுக்கு இந்த புத்தகம் ஒரு நல்ல ஆரம்பம். எந்த ஒரு இயக்கமாக இருந்தாலும் அதற்கு ஆணி வேராக ஒருவர் இருக்க வேண்டுமே - அடுத்த புத்தகத்தில் இன்னும் விரிவாக இருக்கிறது.

பிரபாகரன் என்ற மாபெரும் போராளியைப் பற்றியும், தமிழ் ஈழ பிரச்சினை பற்றியும் 206 பக்கங்களுக்குள் எழுதுவது என்பது சவால்தான் - பா.ராகவன் மிகத் திறமையாக, கிட்டத்தட்ட அனைத்து விஷயங்களையும் தொட்டுச் செல்கிறார். இந்த மூன்று புத்தகங்களும் ஒரு அருமையான தொகுப்பு, அவசியம் உங்கள் புத்தக அலமாரியில் இருக்கலாம்.

செவிக்கு உணவில்லாத போது...

சென்ற இரண்டு வாரங்களாக ஒரு அமெரிக்கன் கிளையண்டிற்கான மேனேஜ்மென்ட் கன்சல்ட்டிங் (அப்படி என்றால் என்னவென்று கடைசியில்) வேலையால் அலுவலகத்தில் இரவு நீண்ட நேரம் இருக்க வேண்டியதானது. ஒரு நாள் இரவு உணவிற்கு, டாமினோஸ் பீட்ஸா - டபுள் பர்ஸ்ட் ஆர்டர் செய்தேன் - ம்ம்ம் சூப்பர்...

ரசித்த பதிவு...

ரெட்டைவாலின் இந்த பதிவு - நன்றி ரெட்டைவால்.

ரசித்த பாடல்...

எவண்டி உன்ன பெத்தான்...கைல கிடைச்சா செத்தான். இந்த லிங்க்கில் இருக்கும் முதல் கமெண்ட் பாடலை விட அருமை.

- உன்ன பார்த்த ஃபர்ஸ்ட் செகண்ட்ல 'கல்ல' காணோம்....தேடிப்பாக்குறேன் உங்கப்பன் டி.ஆர்-ஐயும் காணோம்... :-)

மேனேஜ்மென்ட் கன்சல்ட்டன்சி....

.....என்றால், உங்களுக்கு என்ன பிரச்சினை என்பதை உங்களிடமே கேட்டு, அதற்கான தீர்வையும் உங்களிடமிருந்தே கறந்து, அதை அழகாக ஜிகினா ஒட்டி, பார்சல் பண்ணி உங்களுக்கு கொடுத்தால்...நான் செய்வதற்குப் பேர்தான் மேனேஜ்மென்ட் கன்சல்டன்சி, நீங்கள் செய்வதற்குப் பேர்தான் 'சொந்த செலவில் சூனியம் வைத்துக்கொள்வது' ;-)

அடுத்த வாரம் பார்க்கலாம்.

-ஷோபன்

மீண்டு(ம்) நான்

2011-03-18T23:00:00.004+05:30

தமிழ் கூறும் நல்லுலகத்திற்கு வணக்கம். நானும் வலைப்பூ ஆரம்பிக்கிறேன் பேர்வழி என்று சுமார் நான்கு வருடங்களுக்கு முன்பு ஆரம்பித்தது இது. எழுத ஆரம்பித்த பிறகுதான் தெரிந்தது, இது சாதாரண வேலையில்லை, குறைந்தபட்ச உழைப்பாவது தேவை என்று. வெறுமனே வந்து ஜல்லியடித்துவிட்டுப் போவதில் எனக்கு உடன்பாடு இல்லை. அப்போதிருந்து பிற வலைப்பதிவுகளை படிப்பதோடு சரி.

அதெல்லாம் சரி, இப்போது எதற்கு மீண்டும் என்று கேட்கிறீர்களா? வேலைப்பளு மிக அதிகமாகி விட்டது - ஒரு வடிகாலாக இந்த வலைப்பூவை மீண்டும் உபயோகிக்க ஆரம்பித்திருக்கிறேன். குறைந்தபட்சம் வாரம் ஒரு பதிவாவது இட முடியுமா என்று பார்க்கலாம். எனக்கு அவ்வளவு நன்றாக எழுத வராது, பரவாயில்லை, எழுதிப்பழகலாம் - ஒரு சினிமாவைப் பற்றியோ, அழகான பாடலைப் பற்றியோ, நல்ல புத்தகத்தைப் பற்றியோ, தொழில் துறை/ நுட்பங்களைப் பற்றியோ - எதையாவது எழுதிப்பார்ப்போம்....

....பார்போம், எவ்வளவு நாள் இது தொடர்கிறது என்று.

-ஷோபன்

17. பருத்திவீரன் - ஒரு பார்வை

2007-02-25T21:07:00.000+05:30

நீண்ட நாட்களாக எதிர்பார்த்துக் கொண்டிருந்த பருத்திவீரன் படம் இன்றுதான் பார்த்தேன். ஒரு வரியில் சொல்வதானால் அசத்திவிட்டான் பருத்திவீரன்.

கதை என்று பார்த்தால் புதிதாக அல்லது பெரிதாக ஒன்றும் இல்லை (இது ஒரு உண்மைக் கதை). ஆனால் சொன்ன விதத்தில்தான் அட்டகாசமே.
பருத்திவீரனை விரட்டி விரட்டி காதலிக்கும் முத்தழகு, இதனை ஆதரிக்கும் ப.வீ.ன் சித்தப்பா செவ்வாயன், எதிர்க்கும் முத்தழகின் அப்பா கழுவன், காரணம் சாதி மற்றும் முன் பகை. கடைசியில் பருத்திவீரனும் முத்தழகும் என்ன ஆகிறார்கள் என்பதுதான் கதை.

பருத்திவீரனாக சூர்யாவின் தம்பி கார்த்தி, முத்தழகாக ப்ரியாமணி, செவ்வாயனாக சரவணன் ( நந்தாவில் ராஜ்கிரணின் மருமகனாக வருவாரே), கழுவனாக பொன்வண்ணன். வாழ்ந்திருக்காய்ங்கணே.

கார்த்திக்கு இது முதல் படமானே சந்தேகமா இருக்கு, அசத்துகிறார். கிட்டத்தட்ட சூர்யாவின் சாயல், உடல்மொழி மற்றும் குரல். இது இவருக்கு பலமா, பலவீனமா என்று தெரியவில்லை. பொறுத்திருந்து பார்ப்போம். இவருக்கு அட்டகாசமான கிராமத்து சண்டியர் பாத்திரம். ஒரு வேலையும் செய்யாமல், எப்போதும் மப்பில் திரிவது, ரம்மி விளையாடி காசு பார்ப்பது, அடிதடி, சண்டை வெட்டு குத்து என்று எப்போதும் பருத்தியூர் போலீஸ் ஸ்டேசனிலும், கமுதி கோர்ட்டிலும் கிடப்பது இதுதான் வேலை.

இது மிகவும் போரடித்துப் போக தன் வாழ்க்கையின் லட்சியமாக ஒருமுறையாவது சென்னை சென்ட்ரல் ஜெயிலுக்கு போக வேண்டும், டி.வி., பத்திரிக்கைகளுக்கு கை அசைத்தபடியே பேட்டி கொடுக்க வேண்டும் என்று சித்தப்பா செவ்வாயனிடம் தண்ணியடித்துவிட்டு உளருவது அட்டகாசம்.

படம் முழுக்க நக்கலும் நையாண்டியுமாக மதுரைத் தமிழில் பின்னுகிறார். முத்தழகுவின் காதலை ஏற்றுக்கொண்ட பின், நெஞ்சில் ஆர்ட்டின் படம் பச்சை குத்தி அதில் அம்பு விட சொல்வது, கரகாட்டக்காரர்களை மிரட்டி இவர்களுக்கு மட்டும் ஆடச்சொல்லி சித்தப்புவுடன் ஆட்டம் போடுவது, முத்தழகுவிடம் தன் காதலை வெளிப்படுத்திவிட்டு கெத்தாக நின்று போஸ் குடுப்பது, பின்னாலேயே சென்று கோவிலுக்கு வா என்று சொல்லிவிட்டு நெஞ்சை நிமிர்த்திக்கொண்டு நாங்கெல்லாம் யாரு என்பது மாதிரியான கெத்தாக நடப்பது, கடைசிக்காட்சியில்.....அது வேண்டாம், திரையில் பாருங்கள், பின்னுகிறார் கார்த்தி.

ப்ரியாமணிக்கு இவ்வளவு நடிக்கத் தெரியுமா, அடுத்த சர்ப்பிரைஸ் இது. சரக்கு ஊற்றிக்குடுத்து வீரனை கட்டிலில் கட்டிப்போட்டு பச்சை குத்திவிடுவதாகட்டும், தூங்கிக்கொண்டிருக்கும் வீரன் மீது ஸ்டூலை எடுத்துப்போட்டு உக்கார்ந்து அவன் நெஞ்சின் மீது கால் வைத்து நாளைக்கு எனக்கு பொறந்த நாளு வந்து பாரு என்று மிரட்டுவதாகட்டும், வீரனுடன் சுற்றுவதை பார்த்த அப்பா கழுவன் வீட்டில் அடி பின்னிய பிறகு சோற்றை அள்ளிப்போட்டு, கறியுடன் சேர்ந்து பிசைந்து சாப்பிடும் வேகம் ஆகட்டும், வீட்டை விட்டு வீரனுடன் ஓடிப்போக முயலும் போது தடுக்கும் அம்மாவின் கழுத்தில் அரிவாளை வைத்து முறைப்பதாகட்டும், இவையனைத்தையும் விட கடைசிக்காட்சியில் பிரமாதப்படுத்திவிட்டார். ப்ரியாமணிக்கு ஒரு பேர் சொல்லும் படம்.

இவர்களைத் தவிர படம் முழுதும் வீரனின் கூடவே வரும் செவ்வாயன் சரவணன், கழுவன் பொன்வண்ணன், இவரது மனைவியாக வரும் பெண்மணி, அரைச்சாக்கு என்ற பெயரில் வரும் சிறுவன், கஞ்சா கருப்பு (பருத்திவீரனும் செவ்வாயனும் பண்ணுகிற அலப்பறைக்கு முன்னால் இவரின் காமெடி எடுபடவில்லை), மற்றும் பல பெயர் தெரியாத புது கிராமத்து முகங்கள் எல்லோரும் உணர்ந்து செய்திருக்கிறார்கள்.

வசனம், பாடல்கள், ஒலி, ஒளிப்பதிவு எல்லமே கிராமத்து வாழ்க்கையை கண்முன் கொண்டுவந்து நிறுத்துகின்றன. மதுரை ஸ்லாங் புரியாதவர்களுக்கு கொஞ்சமே கொஞ்சம் சிரமமாக இருக்கும் என்று நினைக்கிறேன். அழுத்தமான கதை என்று இல்லாவிட்டாலும், பருத்திவீரன் செய்த சில தவறுகள் எப்படி முத்தழகுவை பாதித்தது என்ற க்ளைமாக்ஸ் நன்றாக இருந்தாலும், ஏதோ குறைவது போல் இருக்கிறது.

ஒரு அருமையான கிராமத்து காதல் கதையை பார்க்கவேண்டும் என்று நினைப்பவர்கள் தாராளமாக பார்க்கலாம். அட்லீஸ்ட் கார்த்தி மற்றும் ப்ரியாமணிக்காக பார்க்கலாம்.

மேலும்
சென்னைக் கச்சேரியில் தேவ் அண்ணனின் விமர்சனம்
குரல்வலை : வலைகுரலின் விமர்சனம் இங்கே

16. நான் ஏன் ஆராய்ச்சி மாணவன் ஆனேன்?

2007-02-14T13:28:00.000+05:30

மிக முக்கிய 8 காரணங்கள்

1. எனக்கு தூக்கத்த, தூங்குறது பிடிக்கல.

2. என் வாழ்க்கைய போதும் போதுங்கிற அளவுக்கு எஞ்சாய் அதான் அனுபவிச்சிட்டேன்னு நெனக்கிறேன்.

3. மனசுல டென்சனே இல்லாம வாழ்றதெல்லாம் ஒரு வாழ்க்கையா (நாங்கெல்லாம் பிரச்சினைய போர்வையா போத்திக்கிட்டு தூங்குறவய்ங்க).

4. அப்பப்ப பண்ண பாவம், கருமாந்திரத்துக்கெல்லாம் பரிகாரம் பண்ணனும்னு நெனக்கிறேன்.

5. கீதை சொல்றத பாலோ பண்றேன் 'கடமய செய்யி, பலன எதிர்பாக்காத'.

6. வாழ்க்கையில நாம் செய்யிற ஒவ்வொண்னுத்துக்கும் ஒரு அர்த்தம் இருக்கும், ஆனா அது என் வேலையில தப்புண்னு காட்டப்போறேன்.

7. என் குடும்பத்து மேல இருக்கிற கோவத்தையெல்லாம் பழி தீர்த்துக்கப் போறேன்.

8. எனக்கும், என் பாசக்கார பயபுள்ளைகளாகிய நண்பர்களுக்கும் இடையில ஒரு பிரிவு வேணும்னு நெனக்கிறேன்.

நண்பர்களே, இதெல்லாம் நான் எழுதலீங்க. என்னிய மாதிரியே ஆராய்ச்சி மாணவனா இருந்து வாழ்க்கைய வெறுத்த ஒரு பாசக்கார பயபுள்ள நொந்து போயி குறுஞ்சேவை தகவல்ல அனுப்புனது. இதேமாரி புண்பட்ட நெஞ்சங்கள் யாராவது இருக்கீங்களாப்பா?

15. அனுவின்றி ஓர் அணுவும்

2006-12-30T15:36:00.000+05:30

ஒரு முக்கியமான டிஸ்கி:
ஒரே உச்சரிப்பைக் கொண்டிருக்கும் வேறு வேறு வார்த்தைகளைப் பற்றி யோசித்து கொண்டிருக்கும் போது தோன்றியது இது.
ஒருவேளை எனக்கு ஒரு காதலி இருந்து அவளுக்கு அனு என்று பெயரும் இருந்தால்...எப்படி என் லாவகமான சிந்தனை :-)
------------------------------------------------------------
அவனின்றி
ஓர் அணுவும்
அசையாது
அது சரி

ஆனால் எனக்கு
அனுவின்றி
ஓர் அணுவும்
அசையாதே.
-----------------------------------------
அனு ஒருமுறை
என்னிடம் கேட்டாள்
"நான் குண்டானா
உனக்குப் பிடிக்குமா?"

நான் சொன்னேன்
"அய்யோ வன்முறை
வேண்டாம், எனக்கு
அனுகுண்டுனா பயம்".

அப்போது வெடித்துக்
கிளம்பிய சிரிப்பில்
சிதறிப் போனவன்தான்
நான்.
---------------------------------------
அணுக்களால் ஆனது
உலகம் - இது அறிவியல்

அனுவால் ஆனது
நான் - இது காதல்
---------------------------------------
அணுக்கதிர் வீச்சிலிருந்து
கூட தப்பிவிடலாம்
ஆனால் அனு-கண்
வீச்சிலிருந்து...
--------------------------------------
"அணு அறிவியல்
தெரியுமா உனக்கு?"
என்றாய் நீ.

"அனு அறிவியல்
தான் தெரியும்"
என்றேன் நான்.

வெட்கத்தில்
சிரித்தாய் நீ.

அப்போது என்மனதில்
நிகழ்ந்தது தான்
அனுக்கரு சிதைவு.
----------------------------------------
எலெக்ட்ரான்கள் எல்லாம்
அணுக்கருவைச் சுற்றிச்
சுற்றி வருமாம்

நான் அனுவை
சுற்றிச் சுற்றி
வருவதைப் போல.
---------------------------------------

14. இந்த விசயம் கடவுளுக்குத் தெரியுமா?

2006-12-22T03:33:00.000+05:30

ராமரும் பாபரும்

எஞ்சாமி பெருசா
ஓஞ்சாமி பெருசா
வா பார்த்துப்புடலாம்

முட்டிக் கொண்டன
அறிவிலிகள்
உடைந்தன கோவில்கள்
நொறுங்கியது மசூதிகள்

லேய்...யார்ரா அது
முக்காடு போட்டு போறது
அட நம்ம
ராமரும் பாபரும்
--------------------------------------------
இந்த விசயம் கடவுளுக்குத் தெரியுமா?

கடவுளைப் பார்க்க
கியூ வரிசை

சாதா தரிசனம்
இலவசம்
ஸ்பெசல் தரிசனம்
10 ரூபாய்

ஏனுங்க இந்த விசயம்
கடவுளுக்குத் தெரியுமா?
---------------------------------------------

13. இது கதையல்ல கதை

2006-12-19T17:24:00.000+05:30

சென்ற ஞாயிற்றுக்கிழமை கார்ட்டூன் சேனல் பார்த்துக் கொண்டிருந்த போது கண நேரத்தில் உருவானது இந்த கதையின் கரு.
-------------------------------------------------------------------------
இது கதையல்ல கதை

ஒரு நாள் என் நண்பன் சரவணன் ரொம்ப அவசரமா என் இன்னொரு நண்பன் ரவிய தேடி வந்தான். அப்ப நானும் ரவியும் அவன் வீட்டு மாடில ஒக்காந்து பேசிக்கிட்டு இருந்தோம். சரவணன் ஒரு டைரக்டர்கிட்ட அசிஸ்டண்டா வேலை செய்றான். அதாவது உதவி இயக்குனர்.

"வாடா சரவணா! என்னடா ரொம்ப நாளா ஆளையே காணோம்?".

"இல்ல மச்சான்! வேலை ரொம்ப அதிகமாயிருச்சு, புது இடம், புது டைரக்டரு, வேலை பெண்டெடுக்குறாங்கடா".

"என்ன கொடுமை சரவணன் இது".

"டேய், எனக்கேவா?".

"அப்புறம் சொல்லு மச்சி, என்ன விசேசம்? என்னங்கிறாங்கெ உங்க சினிமா மக்கள்?"

" நான் வந்ததே வேற ஒரு விசயமா. எனக்கு நீதான்டா ரவி ஒரு உதவி பண்ணனும்".

"சொல்டா என்ன வேணும்?"

"டேய் எனக்கு ஒரு கதை வேணுன்டா..."

"என்னாது கதையா?" ரவி அதிர்ச்சியா சரவணன பார்க்க, நான் ஒன்னுமே புரியாம அவிங்களையே பார்த்துக்கிட்டு இருந்தேன்.

"ஆமாடா ரவி. உனக்கே தெரியும், ரொம்ப நாள் நாயா பேயா அலைஞ்சு இப்பதான் இந்த சான்ஸ் கிடைச்சிருக்கு. நான் வேற புதுசா, எழவு எல்லா வேலையயும் என் தலையில கட்டிர்ராங்க. டீ வாங்கி குடுக்கிறதுல ஆரம்பிச்சு எல்லா வேலையும் நாந்தேன் பண்ணனும்".

"ம்ம்....அதுக்கு?".

"டைரக்டரு புது படம் ஆரம்பிச்சிட்டாரு. நாளைக்கு சூட்டிங் போறோம். அதுக்குள்ள அவரு எதிர் பாக்கிற மாதிரி ஒரு கதை வேணுமான்டா. நீதாண்டா ஏற்பாடு பண்ணனும்".

"டேய் என்னாடா, பஸ்ல ஏறி தி. நகருக்கு ஒரு டிக்கெட் வேணுன்னு சொல்ற மாதிரி சொல்ற, கதைக்கு நான் எங்கடா போவேன்" கடுப்பான ரவி மேலும் "டேய் எனக்கு தெரிஞ்சதெல்லாம் பாட்டி வடை சுட்ட கதைதான், ஏண்டா உனக்கு ஏதும் தெரியுமாடா?" என்று என்னை பார்த்து கேட்டான்.

"டேய் என்னதான்டா பேசிக்கிறீங்க, எனக்கு ஒன்னுமே புரியலயே, இப்பவே கண்ண கட்டுதேடா."

ரவியும் நானும் கடுப்பு ப்ளஸ் புரியாமல் சரவணணைப் பார்க்க, அவன் அதை விட குழப்பமா எங்களை பார்த்தான்.

ரவி, "ஏண்டா இப்பிடிதான் ரொம்ப நாளா படம் எடுக்குறாங்களா, ஏண்டா சூட்டிங் போன பிறகுதான் கதை என்னான்னு உக்காந்து யோசிப்பாங்கெளா, வெளங்கிரும்டா தமிழ் சினிமா".

"டேய் டேய், என்னாடா பேசுறீங்க, ஏண்டா கதை கூட இல்லாமயாடா சூட்டிங்க்குக்கு போவோம். நான் சொல்றது கதை இல்லடா...கதை".

"என்னாது கதையில்ல ஆனா கதையா. டேய் நேத்து வரைக்கும் நல்லாத்தானடா இருந்த. என்னடா ஆச்சு?", இது ரவி.

"அய்யய்யய்ய! வெண்ணைகளா!! கதைடா கதை...க...தை...பழைய சாமி படங்கள்ல எல்லாம் வச்சிருப்பாங்களே, அட மகாபாரதத்துல பீமன் தோள்ள சாச்சு வச்சிருப்பாரே, அட அனுமார் கூட கைல வச்சிருப்பாருல்லடா. கதைடா கதை".

"ஓ! அந்த கதையா. ஏண்டா சொல்லவேயில்ல....என்னாதிது சின்னப்புள்ளத்தனமா இருக்கு...ராஸ்கல்".

"டேய் ரவி! உங்க மாமா ஒருத்தரு சினிமாவுக்கான கலைப் பொருட்கள் எல்லாம் வாடகைக்கு விடுற கடை வச்சிருக்காருதான. அதான் உன் மூலமா கதை வாங்கலாம்னு...."

"அடப்பாவி, நல்லா கெளப்புராங்கையா பீதிய!......."

[Image from www.indiafm.com]

12. தலைவருக்கு பிறந்த நாள்

2006-12-12T03:32:00.000+05:30

12-12-2006

தலைவருக்கு பிறந்த நாள்!!!

என்னென்னவோ எழுத வேண்டுமென்று நினைத்தேன். தலைவரைப் பற்றி நினைத்தாலே (இனிக்கும்) பரவசத்தில் ஒன்றும் தோன்றவில்லை. வேறென்ன,

இனிய பிறந்த நாள் வாழ்த்துக்கள் தலைவா!!!

11. பிடிமானமில்லாமல் சிறுநீர் கழிக்கும் திறன்

2006-12-11T23:01:00.000+05:30

ஒவ்வொருவருக்கும் ஏதோ ஒரு வேலை செய்யும் போதோ அல்லது எதையாவது பார்க்கும் போதோ சட்டென்று சில பாடல்களோ அல்லது கவிதையோ நினைவிற்கு வரும். அது அந்தச் சந்தர்பத்திற்குப் பொருத்தமாகவோ அல்லது பொருத்தமற்றோ கூட இருக்கலாம்.

அதே போல் எனக்கு தினமும் குளிக்கும் போது வைரமுத்துவின் இந்த கவிதை நினைவிற்கு வரும்.

"குளிக்கும் வரை நினைவிருக்கும்
குளிக்கும் போது மறந்தே போகும்
காது மடல் தினம் கழுவியதில்லை"

இதே போல் ஒவ்வொரு ரயில் பயணத்தின் போதும் கழிப்பறையை உபயோகிக்கும் போது இது நினைவிற்கு வரும்.

"ஓடும் ரயிலில் பிடிமானமில்லாமல்
சிறு நீர் கழிக்கும் திறனுமில்லை"

(இதற்கு கலைஞர் கருணாநிதி தன் முன்னுரையில் கேலியாக " நல்ல வேளை கவிஞர் எந்த பிடிமானம் என்று சொல்லவில்லை" ;-)).

மேலே குறிப்பிட்ட இரண்டுமே ஒரே கவிதையில் வரும் இரு வேறு பத்திகள். கவிஞர் இதே போல் தன்னுடைய பல குறைகளைச் சொல்லிக்கொண்டே போய் "இவ்வளவு குறைகள் இருந்தும் என்னுள் எப்படி நிறைந்து வழிகின்றாய் தமிழே" என்பது போல் முடிப்பார் (பார்க்க: வைரமுத்து கவிதைகள் அல்லது இந்த பூக்கள் விற்பனைக்கல்ல என்று நினைக்கிறேன் மேலும் மிகச் சரியாக வார்த்தைகள் நினைவில் இல்லை, மன்னியுங்கள்).

இதே போல் உங்களுக்கு சில பல சந்தர்ப்பங்களில் ஏதேனும் நினைவிற்கு வருவதுண்டா?

10. சற்றே பெரிய பின்னூட்டம் to செந்தழல் ரவி

2006-12-07T23:01:00.000+05:30

இது செந்தழல் ரவியின் பதிவுக்கு என்னுடைய சற்றே பெரிய பின்னூட்டம். ரவியின் பதிவுக்கு கீழே க்ளிக்குக.
http://tvpravi.blogspot.com/2006/12/blog-post_07.html

ரவி அண்ணே,

அபத்தத்திலிலேயே பெரிய அபத்தம் தமிழ் சினிமாவில இருக்கிற அபத்தத்தை லிஸ்ட் பண்ண சொன்னதுதான், இதுக்கெல்லாம் ஒரு பின்னூட்டம் பத்தாது, தனி வலைப்பூ ஆரம்பிச்சு தினம் ஒரு பதிவு போடலாம். இருந்தாலும் உங்களுக்காகவும், தமிழ் கூறும் நல்லுலகத்திற்காகவும்...

1. வில்லன் கெலிகாப்டர்ல போனாலும், இவரு வில்லன துரத்திக்கிட்டே ஓடிப்போயித்தான் பிடிப்பாராம், யாரு நம்ம ஈரோவாகப்பட்டவர் தான்.

2. வில்லன் முன்னாடி ஜீப்லயோ, வேன்லயோ ஈரோயினாகப் பட்டவளையோ, அம்மாவயோ கடத்திக்கிட்டு போவாராம், இவரு பின்னாடியே ஓடும் போது, ஒரு புண்ணியவான் இவருக்காகவே புல்லட் நிறைய பெட்ரோல் போட்டு, சாவியோட மரத்தடில வச்சிட்டு உச்சா போயிக்கிட்டே இருப்பாரு, இவரு நோகாம எடுத்துக்கிட்டு போவாராம். (ஏண்டா டேய்! உங்களுக்கெல்லாம் வண்டியில பெட்ரோலே தீராதா, டிராபிக் போலீஸ் பிடிச்சு லைசன்ஸ், ஆர்.சி. புக் செக் பண்ண மாட்டாங்களா).

3. அட இது கூட பரவாயில்ல, இவரு பைக்ல வேகமா போறாராம், அப்பிடியே குனிஞ்சுக்கிட்டு....உர்ர்ர்ர்னு ஆக்ஸிலேட்டரை முறுக்குவாரு (ஏதோ பெரிசா ஏரோபாயில் ஷேப்ப கிரியேட் பண்ணி ஓட்டுரதா நெனப்பு).

4. இதுவும் போன பாயின்ட்டோட சேந்ததுதேன். இவரு வேகமா போறத காட்டுறதுக்கு, அடிக்கடி கியர் மாத்துரதை காமிப்பாங்கெ. (ஏண்டா! நல்லா வேகமா போற வண்டில எதுக்குடா கியர நோண்டிட்டிருக்க). டாப் ஸ்பீடுல போறார்ங்கிறதை ஸ்பீடாமீட்டர வேற க்ளோசப்ல காட்டுவாங்கெ. அப்பப்பாத்து ஒரு கண்டெயினர் லாரி கரெக்ட்டா குறுக்கால போகும், நல்லா கெளப்புராங்கப்பா பீதிய.

5. ஓகே, இனி சென்டிமெண்ட்ஸ். ஆசுபத்திரி ஆபரேசன் தியேட்டர் வாசல்ல குட்டி போட்ட பூனை மாதிரி நடந்துக்கிட்டு இருப்பாங்க, பெருசா கண்ணாடி போட்ட டாக்டர் வந்து கண்ணாடிய மெதுவா கழட்டிக்கிட்டே "சாரி! நாங்க எவ்வளவோ....." (ஆமா கண்ணாடி போடாத டாக்டர் எத கழட்டிக்கிட்டே சொல்லுவாரு).

6. ஆக்ஸிடன்ட்லயோ, எதுலயோ மாட்டின ஒருத்தன தூக்கிக்கிட்டு ஆசுபத்திரிக்கு கொண்டு போனா கண்டிப்பா இந்த ரெண்டுல ஒரு டயலாக் தான்..
a. ஒரு அரைமணி நேரம் லேட்டாயிருந்தாக் கூட எங்களால காப்பாத்தியிருக்க முடியாது.
b. ஒரு ஒன் அவர் முன்னாடி கொண்டு வந்திருந்தீங்கன்னா...(டேய் ஆக்ஸிடென்டே கால் மணி நேரத்துக்கு முன்னாடிதான்டா ஆச்சு).

7. அவசரமா ரத்தம் சொட்டச் சொட்ட ஸ்டெரச்சர்ல வச்சு, ஆப்பரேசன் தியேட்டருக்கு கொண்டு போவாங்க, ஒரு நர்ஸ் வந்து "எல்லாரும் வெளிய இருங்க"னு சொல்றதக்கூட கேக்காம ஈரோவோ, ஈரோயினியோ உள்ள போக டிரை பண்ணுவாங்க, என்னமோ அவிங்களே போயி ஆப்புரேசன் பண்ணப்போறது மாதிரி.

8. ஈரோயினி ஈரோவப் பாத்து ஒன்னுந்தெரியாத பட்டிக்காட்டான்னு சொன்ன பிறகுதான் ஈரோ அவரோட ரெபிடெக்ஸ் ஆங்கில புலமையை கால் மணி நேரத்துக்கு தம் கட்டி பேசிக்காட்டுவாரு. அதுவும் இங்கிலிபீசுல பேசிட்டா புத்திசாலியாம், ஏன்... ரிலேட்டிவிட்டி தியரிய விளக்குறது.

9. ஈரோ 'தண்ணி'யடிச்சா அவரு சோகத்துல இருக்காராம், வேற யாராவது தண்ணியடிச்சா "ச்சீ...பொறுக்கி நாயி"னு ஈரோயினி திட்டுவாங்க.

10. ஈரோயின் மேல ஈரோ தெரியாம மோதிட்டா " நீயெல்லாம் அக்கா, தங்கச்சி கூட பொறக்கல"னு கண்ணகியோட கசின் சிஸ்டர் மாதிரி கேப்பாங்க. ஆனா ஈரோ மேல ஈரோயினி தெரிஞ்சே மோதினாலும் " நீயெல்லாம் அண்ணன், தம்பி கூட பொறக்கல"னு கேக்கமாட்டாரு.

11. பொண்ணுண்னா அடக்கமா இருக்கனும், அமைதியா இருக்கனும்னு சொல்லி முடிச்ச அடுத்த சீன்லயே இம்மினிக்கூண்டு டிரஸ் போட்ட ஈரோயினி கிட்ட போயி 'வருவியா...வரமாட்டியா'னு கெஞ்சிக் கூத்தாடி குத்து டான்ஸ் போட்டுக்கிட்டு இருப்பாரு.

12. ஈரோவுக்கு ஒலகத்துல தெரியாத விசயமே கிடையாது, எல்லா இசைக்கருவிகளையும் வாசிப்பாரு, எல்லாவிதமான வண்டிகளையும் ஓட்டுவாரு, டைம்பாம்ல கரெக்ட்டா வயர கட் பண்ணுவாரு, வீட்ல அம்மாக்கு சமையல்ல உதவுவாரு, துப்பாக்கி சுடுவாரு, கத்தி சுத்துவாரு, வர்மக்கலைல இருந்து டேக் ஒன் வரைக்கும் தெரியும், தீவிரவாதிகளை கண்டுபிடிக்க அரசாங்கமே இவரதான் கெஞ்சி கேக்கும், ஊருக்கே அறிவுரை சொல்றேங்கிற பேர்ல மொக்கயப் போடுவாரு, ஒண்ணுந்தெரியாத கிராமத்து மக்கள் முன்னாடி, கலெக்டர்கிட்டயோ இல்ல திமிர் பிடிச்ச ஈரோயின் முன்னாடியோ தன்னோட ஆறு வருசம் அரியர் வச்சு முடிச்ச இங்கிலிபீசு அறிவ காட்டுவாரு......................................................ஆனா அவங்கம்மாவ வில்லன் எப்ப கடத்துவான்னு தெரியாது. வில்லன் கடத்த வரும்போது இவுரு தனியா தேமேன்னு யாருமே இல்லாத கடையில ஷாப்பிங் பண்ணிக்கிட்டிருப்பாரு.

அடப் போங்கப்பா, இதெல்லாம் ஒரு நாள்ல எழுதி முடிக்கிற காரியமா? இத எழுதுறதுக்கு பதிலா ராமஜெயம் எழுதியிருந்தாக் கூட புண்ணியம் கெடச்சிருக்கும்.

இதையெல்லாம் விட பெரிய அபத்தம் கீழே. தயவு செய்து இளகிய மனம் கொண்டவர்கள் இதற்கு மேலே செல்ல வேண்டாம் என்று தாழ்மையுடன் கேட்டுக்கொள்கிறேன். அதுக்கு மேல ஒங்க இஸ்டம்.

...

...

...

...

...

இடுக்கண் வருங்கால் நகுக....வேறென்ன பண்றது.

9. 'கார்த்திக்'குகள் பலவிதம்

2006-12-06T21:15:00.000+05:30

'கார்த்திக்'குகள் பலவிதம், ஒவ்வொருவரும் ஒருவிதம்

ஒரு குட்டி அறிவிப்பு:
இந்த பதிவு யாரையும் கேலி செய்வதற்காகவோ, புண்படுத்துவதற்காகவோ இல்லை. பள்ளி, கல்லூரிப் பருவ நாட்களில் நாம் எப்படியெல்லாம் சுவாரஸ்யமாக வாழ்ந்தோம் என்பதின் ஒரு சிறு பகுதி.

--------------

ஒவ்வொருவருக்கும் அவர்களின் பள்ளி மற்றும் கல்லூரிக் காலங்களில் ஒரே பெயர் கொண்ட பல நண்பர்கள் இருந்திருப்பார்கள். பொதுவாகவே சில பெயர்கள் பரவலாக இருக்கும், அவை சற்றே பழைய பெயர்களோ அல்லது புதிய/மாடர்ன் பெயர்களோ, அவை எல்லோருக்கும் பிடித்தமானவையாகவோ அல்லது அழைப்பதற்கு எளிதாகவோ இருக்கும். (பழைய: முருகன், ராஜா, கண்ணன்..., புதிய/மாடர்ன்: சதீஷ், அஜய், அருண்....).

ஒரே பெயருடைய நண்பர்களை வித்தியாசப்படுத்திக் கூப்பிட அவர்களை பட்டப்பெயர் வைத்துக் கூப்பிடுவோம் (ஆமாம் பெரிய பட்டம், ஆக்ஸ்போர்ட் ஸ்கூல் பட்டம்...). நான் பள்ளியில் படித்துக்கொண்டிருந்தபோது இரண்டு குமரேசன்கள் இருந்தார்கள். ஒருவன் 'குட்டை' குமரேசு, இன்னொருவன் நெட்டை குமரேசு, கல்லூரியில் ஒருவர் 'கும்மாண்டி' குமரேசு. இவர்களை இவர்களின் சொந்த பெயர் சொல்லி அழைப்பதை விட பட்டப்பெயர் சொல்லி அழைக்கும்போது இன்னும் நெருக்கமாகவே உணர்ந்திருக்கிறோம்.

இப்படி எனக்கு கார்த்திக் என்ற பெயரில் பல நண்பர்கள் இருக்கிறார்கள். அவர்களில் சிலருக்கு எப்படி அந்த பட்டப்பெயர் வந்தது என்று கூட எனக்குத் தெரியாது.

பள்ளியில்:

'விரிச்சு' கார்த்தி - (Virtue-னா என்னடா என்று அர்த்தம் கேட்டான், மருவி விரிச்சு என்றாகிவிட்டது)

'யமகா' கார்த்தி - (பள்ளிப்பருவத்தில் Yamaha RX 100 வைத்திருந்த ஒரே நண்பன்)

'பௌலிங்' கார்த்தி - (கரெக்ட்டாக first slip ல் இருப்பவனுக்கு பௌலிங் போடுவான் :-))

கல்லூரியில்:

'சைக்கு' கார்த்தி - (சைக்கோ என்பது நாளடைவில் இப்படி ஆகிவிட்டது)

'மாமா' கார்த்தி - (இனிஷியல் M.A.M.A. என்றிருப்பது ஒரு குறையா)

'மண்டை' கார்த்தி - (நல்லா படிக்கிற மண்டையன்)

'வணக்கம்' கார்த்தி - (யாரைப் பார்த்தாலும் வணக்கம் சொல்வார்)

'ரம்பா' கார்த்தி - (கொஞ்சம் குண்டா, தொடை பெருசா இருந்திரக்கூடாதே :-p)

'பெருசு' கார்த்தி - (கொஞ்சம் வயதில் பெரியவர்)

'போண்டா' கார்த்தி - (எதற்கும் வாயை திறக்கவே மாட்டான், "ஏண்டா வாயில என்னா போண்டாவா வச்சிருக்க" என்ற நாளில் இருந்து)

'கார்' கார்த்தி - (கார் வைத்திருந்த நண்பன்)

'டுபுக்கு' கார்த்தி - (இதற்கு பெயர்க்காரணம் வேறா)

சிலரை பெயர் மற்றும் பட்டத்தோடு சேர்த்து சொன்னால்தான் தெரியும். சிலருக்கு பட்டம் தேவையில்லை பெயர் மட்டும் போதும். 'வணக்கம்' கார்த்தி என்று சொன்னால்தான் அவன் தான் இவன் என்று தெரியும். ஆனால் 'கில்மா' கிரி-யை 'கில்மா' என்று சொன்னாலே தெரியும்.

இவனிடம் ஒரு முறை கேட்டேன் "ஏண்டா! எல்லாரும் உன்ன கில்மா கிரி, கில்மா கிரின்னு கூப்பிடுறாங்களே, கிரி-ங்கறது உன் பேரு, கில்மாங்கிறது நீ படிச்சு வாங்குன பட்டமாடா?" இதற்கு அவன் பார்த்தானே ஒரு பார்வை இன்னும் மனதில் இருக்கிறது.

ஆனாலும் எனக்குத் தெரிந்து இன்றுவரை ஒருவர் கூட என்னை இந்த பேர் சொல்லி அழைக்காதே என்று சொன்னதில்லை. உண்மையில் பெயரில் என்ன இருக்கிறது, பெயர் வெறும் பெயர்தானே.

.
உங்களுக்கும் இதே போல் 'பட்டம்' பெற்ற நண்பர்கள் இருக்கிறார்களா?

8. டேயமைனா... டேயாலோசை

2006-12-06T01:39:00.000+05:30

பொதுவாகவே கரகாட்டம், ஒயிலாட்டம் போன்றவற்றில் பாடுபவர்களுக்கென்றே பிரத்யேகமான குரல் வாய்த்திருக்கிறது. எனக்கு நீண்ட நாட்களாகவே ஒரு சந்தேகம், இவர்களின் உண்மையான குரலே இப்படித்தானா அல்லது வழி வழியாகவே ஒருவர் பாடுவதின் பாதிப்பு மற்றவர்க்கும் தொற்றி அதனால் அவர்களும் அப்பிடி பாடுகிறார்களா என்று தெரியவில்லை.

ஒரு உதாரணத்திற்கு, பருத்தி வீரன் -ல் வரும் 'டங்கா டுங்கா தவிட்டுக்காரி' பாடலில் ஐந்து பேர் பாடியிருக்கிறார்கள். அனைவருக்குமே தட்டையான சற்றே முரட்டுக் குரல்.

"டேயமைனா டேயமைனா டேயமைனா டேயாலோசை

டேயமைனா டேயமைனா டேயமைனா டேயாலோசை"

- என்ற பகுதியையும் (இதற்கு என்ன அர்த்தம்?)

"எங்கள் குல தங்கம்

தேவர் குல சிங்கம்

அருள் முத்து ராமலிங்கம்"

- என்ற பகுதியையும் கேட்டால் இதை உணர முடியும்.

என்னதான் அவர்களின் பாடல்களில் இரட்டை அர்த்தம் தொனிக்கும், சற்றே நெளிய வைக்கும் வார்த்தைகள் இருந்தாலும், அந்த குரல்களில் தெறிக்கும் வலியும், வேதனையும், வறுமையும், ஏக்கமும் நெஞ்சை பிசைபவையாகவே இருக்கின்றன.

இவர்கள் மட்டும் அல்ல, ரயிலில் மற்றும் தெருவில் பாடி பிழைப்பு நடத்துபவர்கள், லேகியம் விற்பவர்கள், பல்வேறு பொருட்களை ஏலம் விடுபவர்கள் (பிதாமகன் சூர்யா கதாபாத்திரம் போல்), ரயில் நிலையங்களில் காபி, தேனீர் விற்பவர்கள் போன்றோர்களுக்கும் தனிப்பட்ட குரல் ஈர்ப்பு இருக்கிறது.

ரயிலில் பாடி யாசகம் கேட்கும் விழியற்றோர்கள் எப்படி அவர்கள் பாடும் பாடலை தேர்ந்தெடுக்கிறார்கள்? அவர்களுக்கென்றே சில பாடல்கள் இருக்கிறதா?

"மண் குடிசை வாசலென்றால்....

அய்யா கண் பார்வை தெரியாது..........

உனக்காக ஒன்று எனக்காக ஒன்று

ஒரு போதும் தெய்வம் கொடுப்பதில்லை...

அய்யா....அம்மா...கொடுத்ததெல்லாம் கொடுத்தான்...

இவன் யாருக்காக கொடுத்தான்..."

இதைப் போலவே தெருவில் லேகியம் விற்பவர்களின் குரலைக் கேட்டாலே நின்று விடுவேன். அதென்னவோ தெரியவில்லை சின்ன வயதிலிருந்தே இவர்களின் குரல்கள் மீது தனி ஈர்ப்பு.

".......பெரியோர்களே, தாய்மார்களே, வாலிப, வயோதிக அன்பர்களே, பாருங்க சார் எங்கள் மருந்து கம்பெனியின் சார்பாக ஒரு கால் அவர் விளம்பரம் சார். பாருங்க சார் இந்த லேகியத்துல ஏழு வகையான மூலிகைகள் கலந்து இருக்கு சார். பாருங்க சார் ஆல வேரு, அங்க வேரு, புங்க வேரு, புருச வேரு, நின்னு அடிக்கிற நீல வேரு, காக்கைக் கருங்குடல், கண்ணில்லாத சிட்டுக்குருவி. பாருங்க இப்பிடி பல அரிய அரிய மூலிகைகள் ....." எனக்கு எப்போதுமே இந்த மாதிரியான குரல்கள் மிக விருப்பமானவையாகவே இருந்திருக்கிறது.

அவர்களும் என்னதான் செய்வார்கள், வயிற்றைக் கழுவ என்னவெல்லாமோ செய்யவேண்டியிருக்கிறது. விதியின் பாடலுக்கு ஆட வேண்டியிருக்கிறது.

".....டேயமைனா டேயமைனா டேயமைனா டேயாலோசை

டேயமைனா டேயமைனா டேயமைனா டேயாலோசை......"

7. உங்களால் வேகமாக படிக்க முடியுமா?

2006-12-06T01:11:00.000+05:30

உங்களால் எவ்வளவு வேகமாக படிக்க முடியுமோ, படித்துப் பாருங்கள் நண்பர்களே!!

6. உயரே பறக்கும் 'ஈ'

2006-11-28T00:01:00.001+05:30

தேசிய விருது பெற்ற 'இயற்கை' திரைப்படத்தின் இயக்குனர் ஜனநாதன் இயக்கிய இரண்டாவது படம். ஒரு சிக்கலான, கீழ் மட்டத்திலிருப்பவர்களுக்கு எளிதில் புரியாத ஒரு விசயத்தை, மிகத் தெளிவாக, மசாலாக் கலவைகளோடு, ஆபாசக் கலப்பின்றி, இரட்டை அர்த்த வசனங்கள் இன்றி எல்லோருக்கும் புரியும் படி கதை சொல்வது அவ்வளவு எளிதல்ல. ஆனால் அதில் வெற்றி கண்டிருக்கிறார் இயக்குனர்.

கதை, கதைக்களம், அதை சொன்ன விதம் இவற்றிற்காகவே இயக்குனரை எவ்வளவு பாராட்டினாலும் தகும்.

இந்த படத்திற்காக மிகவும் பாராட்டப்பட வேண்டியவர்கள்:

1. இப்படிப்பட்ட ஒரு கதையை இந்த மாதிரி எளிமையாகவும் சொல்ல முடியும் என்று காட்டிய இயக்குனர். மிகச்சிறந்த பாத்திரப் படைப்புகள் (ஈ, நெல்லை மணி), இதற்காகவும் தாராளமாக பாராட்டலாம்.

2. இயக்குனரின் மனதில் உள்ளதை அப்படியே திரையில் காட்ட உதவிய ஒளிப்பதிவாளர் மற்றும் கலை இயக்குனர்.

3. சினிமாத் துறையில் 'இமேஜ்' என்று சொல்வார்களே, அதைப்பற்றி எல்லாம் கவலைப்படாமல் 'ஈ'யாக நடித்த ஜீவா மற்றும் நெல்லை மணியாக நடித்த பசுபதி.

இன்னும் நிறைய எழுதலாம், ஆனால் திரையில் பாருங்கள்.

கதை, வசனம், இயக்கம்: ஜனனாதன்
திரைக்கதை: கல்யாண கிருஷ்ணன்
ஒளிப்பதிவு: ஏகாம்பரம்
எடிட்டிங்: விஜயன்
இசை: பறீகாந்த் தேவா
கலை: செல்வகுமார்

மேலதிக விபரங்களுக்கு: www.ethefilm.com

5. -----\\(ஈ)//-----

2006-11-25T21:18:00.000+05:30

தீபாவளிக்கு வெளிவந்த திரைப்படங்களில் "ஈ' நன்றாக இருக்கிறது என்று கேள்விப்பட்டேனே தவிர, இன்று தான் 'ஈ' பார்த்தேன். திரும்ப இன்னொரு முறை பார்க்க வேண்டும் என்று என்னை தூண்டிய படம். வழக்கமான தமிழ் படங்களில் இருந்து வித்தியாசப்பட்ட படம். இந்த படத்தைப் பற்றி விரிஈஈஈவான கருத்துக்களை அடுத்த பதிவில் பார்க்கலாம்.

4. டேயமைனா...டேயாலோசை

2006-11-20T15:20:00.000+05:30

பொதுவாகவே கரகாட்டம், ஒயிலாட்டம் போன்றவற்றில் பாடுபவர்களுக்கென்றே பிரத்யேகமான குரல் வாய்த்திருக்கிறது. எனக்கு நீண்ட நாட்களாகவே ஒரு சந்தேகம், இவர்களின் உண்மையான குரலே இப்படித்தானா அல்லது வழி வழியாகவே ஒருவர் பாடுவதின் பாதிப்பு மற்றவர்க்கும் தொற்றி அதனால் அவர்களும் அப்பிடி பாடுகிறார்களா என்று தெரியவில்லை.

ஒரு உதாரணத்திற்கு, பருத்தி வீரன் -ல் வரும் 'டங்கா டுங்கா தவிட்டுக்காரி' பாடலில் ஐந்து பேர் பாடியிருக்கிறார்கள். அனைவருக்குமே தட்டையான சற்றே முரட்டுக் குரல்.

"டேயமைனா டேயமைனா டேயமைனா டேயாலோசை
டேயமைனா டேயமைனா டேயமைனா டேயாலோசை" - என்ற பகுதியையும் (இதற்கு என்ன அர்த்தம்?)

"எங்கள் குல தங்கம்
தேவர் குல சிங்கம்
அருள் முத்து ராமலிங்கம்" - என்ற பகுதியையும் கேட்டால் இதை உணர முடியும்.

என்னதான் அவர்களின் பாடல்களில் இரட்டை அர்த்தம் தொனிக்கும், சற்றே நெளிய வைக்கும் வார்த்தைகள் இருந்தாலும், அந்த குரல்களில் தெறிக்கும் வலியும், வேதனையும், வறுமையும், ஏக்கமும் நெஞ்சை பிசைபவையாகவே இருக்கின்றன.

இவர்கள் மட்டும் அல்ல, ரயிலில் மற்றும் தெருவில் பாடி பிழைப்பு நடத்துபவர்கள், லேகியம் விற்பவர்கள், பல்வேறு பொருட்களை ஏலம் விடுபவர்கள் (பிதாமகன் சூர்யா கதாபாத்திரம் போல்), ரயில் நிலையங்களில் காபி, தேனீர் விற்பவர்கள் போன்றோர்களுக்கும் தனிப்பட்ட குரல் ஈர்ப்பு இருக்கிறது.

ரயிலில் பாடி யாசகம் கேட்கும் விழியற்றோர்கள் எப்படி அவர்கள் பாடும் பாடலை தேர்ந்தெடுக்கிறார்கள்? அவர்களுக்கென்றே சில பாடல்கள் இருக்கிறதா?

"மண் குடிசை வாசலென்றால்....அய்யா கண் பார்வை தெரியாது..........உனக்காக ஒன்று எனக்காக ஒன்று ஒரு போதும் தெய்வம் கொடுப்பதில்லை...அய்யா....அம்மா...கொடுத்ததெல்லாம் கொடுத்தான்...இவன் யாருக்காக கொடுத்தான்..."

இதைப் போலவே தெருவில் லேகியம் விற்பவர்களின் குரலைக் கேட்டாலே நின்று விடுவேன். அதென்னவோ தெரியவில்லை சின்ன வயதிலிருந்தே இவர்களின் குரல்கள் மீது தனி ஈர்ப்பு.

".......பெரியோர்களே, தாய்மார்களே, வாலிப, வயோதிக அன்பர்களே, பாருங்க சார் எங்கள் மருந்து கம்பெனியின் சார்பாக ஒரு கால் அவர் விளம்பரம் சார். பாருங்க சார் இந்த லேகியத்துல ஏழு வகையான மூலிகைகள் கலந்து இருக்கு சார். பாருங்க சார் ஆல வேரு, அங்க வேரு, புங்க வேரு, புருச வேரு, நின்னு அடிக்கிற நீல வேரு, காக்கைக் கருங்குடல், கண்ணில்லாத சிட்டுக்குருவி. பாருங்க இப்பிடி பல அரிய அரிய மூலிகைகள் ....."

எனக்கு எப்போதுமே இந்த மாதிரியான குரல்கள் மிக விருப்பமானவையாகவே இருந்திருக்கிறது. அவர்களும் என்னதான் செய்வார்கள், வயிற்றைக் கழுவ என்னவெல்லாமோ செய்யவேண்டியிருக்கிறது. விதியின் பாடலுக்கு ஆட வேண்டியிருக்கிறது.

".....டேயமைனா டேயமைனா
டேயமைனா டேயாலோசை
டேயமைனா டேயமைனா
டேயமைனா டேயாலோசை......"

3. டங்கா டுங்கா தவிட்டுகாரி

2006-11-19T23:24:00.000+05:30

இன்று தான் பருத்தி வீரன் பாடல்கள் கேட்டேன். நன்றாகவே செய்திருக்கிறார்கள். இதில் என்னை மிகவும் கவர்ந்த பாடல் டங்கா டுங்கா தவிட்டுகாரி. கிராமங்களில் இருந்து வந்தவர்களுக்கு இந்த பாடல் கண்டிப்பாக பிடிக்கும்.

இசை: யுவன் ஷங்கர் ராஜா

பாடியிருப்பவர்கள்: பாண்டி, லக்ஷ்மி, ராஜா, சரோஜா, கலா

இந்த பாடலில் சிறப்பான விசயமே, தொழில் முறை பிண்ணணிப் பாடகர்களைத் தவிர்த்து கலைக் குழுவைச் சேர்ந்தவர்களையே பாட வைத்ததுதான். பொதுவாக இவர்களுக்கென்றே தனிப்பட்ட குரல் வாய்த்திருக்கிறது. இதைப் பற்றி மற்றொரு பதிவில் விரிவாக எழுதலாம். கேட்டுப்பாருங்கள், கண்டிப்பாக ஆட ஆரம்பித்து விடுவீர்கள்.

இதைத் தவிர ஊரோரம் புளியமரம் பாடலும் அருமை.

பாடியிருப்பவர்கள்: பாண்டி, லக்ஷ்மி, சரோஜா, கலா

கேளுங்கள், மண் வாசணையை அனுபவியுங்கள்.

2. புள்ளி ராஜா

2006-11-19T02:50:00.000+05:30

என்னோட கணிணியில் எதையோ தேடும் போது கிடைத்த 'புள்ளி ராஜா'வின் படம்.

1. முதல் படி

2006-11-19T00:36:00.000+05:30

அப்பாடா! நானும் ஒரு வழியா கிறுக்க ஆரம்பிச்சுட்டேன். ஆனா தடவி தடவி தமிழ்ல டைப் பண்றதுக்குள்ள தாவு தீந்து போகுது. என்ன பண்றது, நானும் வெட்டியாதான் இருக்கேன்கிறத இப்பிடியெல்லாம் காட்ட வேண்டி இருக்கு.

பெயர் காரணம்:
சொந்த பேர்ல 'ப்ளாக்க'லாம்னா ஏற்கனவே பதிவு பண்ணிட்டாங்க. வேற என்ன பேர்ல ஆரம்பிக்கலாம்னு நான் உக்காந்து யோசிச்சா 'நான்' தவிற வேற ஒன்னும் தோணல.

என்னைப் பற்றி:
தற்போது சென்னையில் ஆராய்ச்சி மாணவன்.

இத டைப் பண்றதுக்குள்ளயே கண்ண கட்டுதே, இன்னைக்கு இது போதும்.

வணக்கம்.